Mila poto saldu ditugu jada!

Mila poto, pasatxo. Hiru hilabetetan.

Joño. Bada zerbait.

Gure txikian zifra handia da.

Pasa den astean saldutako salda kaxa kopuruari begiratu, hau bider sei egin (kaxa bakoitzean sei poto datozelako) eta, hara! Mila poto baino gehiago saldu ditugu eta!

Atzo egin zituen Saaldak hiru hilabete jendaurrean. Urtarrilaren 15ean bidali nuen lehen mezu publikoa.

Eta, hiru hilabetera, mila poto pasa salduta.

Lagun zahar eta berrien babesaz. Ahoz-ahokoari esker. Euskarazko hedabideetan soilik azalduta (Segura irratia > Berria > Euskadi Irratia > Eta kitto > ETB1).

Eta publizitatea egin barik! Ojo, publizitatea egitea txarra da? Influentzerrekin kanpainak egitea txarra da? Ez. Horri esker gehiago salduko genuen. Akaso. Azkarrago iritsiko ginen lehen mila potoak saltzera, agian. Baina hasiera honetan, lehen hiru hilabete hauetan, ez zegoen presarik. Eta, aizu, nahiago dut lortutako irabazia pixka bat handitxoagoa izan eta bezeroek aukeratu dituzten GKE horiei ekarpen ganorazkoagoa egitea (urtarrila eta otsaileko dohaintza eginda, laster dator martxoko eta apirileko irabazia nori emango diogun aukeratzeko prozesua).

Ez dago presarik.

Arnas luzekoa izan ohi naiz, ez esprint motzetakoa. Bizitzan, lanean zein kirolean.

Orain, lehen hiru hilabeteetan mila poto pasa saldu izana erritmo polita dela iruditzen zait, eh! Ez duzu uste?

Bidelagun izan nahi baduzu, hemen erosi dezakezu gure behi-hezur salda.

Segi dezagun bidea egiten. Segi dezagun mundua toki pixka bat hobea bilakatzen.