SAALDA hedabideetan lehen hiru hilabete hauetan

Aurrekoan, lehen 1.000 potoak saldu ditugula idatzi nuenean, aipatzen nuen hedabide jakin batzuetan azaldu garela. Labur-labur zerrendatu nahiko nituzke hedabide hauek, nire esker ona azaltzeko eta proiektua ezagutzeko modu aproposa direlako.

Segura irratia

Deitzen lehenak izan ziren Segura irratikoa, proiektua iragarri eta astebete eskaxera hitz egin nuen han, urtarrilaren 23an. Estimatzekoa da izan zuten prestutasuna eta interesa, bereziki kontuan izanik irten berria zela ekimena. Hemen entzun dezakezue elkarrizketa.

Berria

Berrialaguna izanda Berria egunkarian azaltzea beti da pozgarria. Otsailaren 6an argitaratu zen periodikoaren azken orrian Enekoitz Telleriak egindako elkarrizketa. Behean nola geratu zen, hemen irakurgai.

Faktoria - Euskadi Irratia

Faktoriako Ane Albisuk deituta hitz egin nuen lehen aldiz hedabide batean esklerosi anizkoitzari buruz 2019ko urtarrilean. Gogoan daukat oraindik berarekin eta Manu Etxezorturekin egindako elkarrizketa hura. Goxo hartu izan naute beti Faktoriakoek, orduan zein oraingoan. Otsailaren 16an izan zen elkarrizketa eta hemen entzun dezakezu.

Eta Kitto

Ni neu eibartarra izanda herriko aldizkarian azaltzea beti da pozgarria. SAALDA proiektuari buruz berbetan martxoaren 8an atera nintzen. Behean daukazue nola irten zen paperean, eta hemen digitalean, elkarrizketaren pasarte batzuk bideoan ere ikusgai.

Biba zuek - ETB1

Esklerosi anizkoitza edukitzea zer den, diagnostikoaren ostekoak, Zazpi proiektua, mendiak ematen didana eta SAALDA. Gai ugari izan genituen mintzagai apirilaren 3an Biba zuek ETB1eko saioan. Hemen daukazue ikusgai.

SAALDA ezagutzera ematen lagunduko diguzu?

Hedabideetan azaltzeak laguntzen digu gure proiektua ezagutzera ematen. Laguntza oro da ongietorria, noski! Harremanetan jartzeko idatzi mikel@saalda.eus helbidera.

Mikel Lizarralde
2024-04-18

Blogeko beste artikulu batzuk:

Hamalau mila esker

2025-01-07

Abendu amaieran fakturazioari begiratu eta, hara, 14.000 euro fakturatu ditugu barren 2024an!

Gipuzkoako Foru Aldundiaren Fakturabai tresnak dio zehazki 14.002,11 euro izan direla (BEZ gabe).

Eta salmenta horiei esker 4.415 euroko dohaintzak egin ahal izan ditugu.

Hau da, salmenten %31,53 dohaintzan eman dugu.

Eta aditza pluralean idazten dihardut, nahita. Ez SAALDAn hamaika pertsonak lana egiten dutela mozorrotzeko “GU” erabilita.

“GU” darabilt salmenta-kopuru hori lortzeko funtsezkoenak EROSLEAK izan direlako. Haiek barik, jai-jai.

Lehen urtea eta 14.000 euro saldu ditugu.

Biba GU!

Gure hirugarren dohaintza

2024-07-16

Maiatzean eta ekainean 880 euroko irabazia izan dugu SAALDAn eta hori izan da dohaintzan eman duguna. Maiatzean eta ekainean saldu dugunari gastuak kenduta kalkulatzen dugu irabazien kopurua.

Bezeroei galdetzen diegu ea zein elkarte proposatzen dituzten. Guztiekin zerrenda osatu eta bozkatzeko unea da. Bezero bakoitzak botu bat.

Horrela, maiatzeko eta ekaineko 880 euro hauen dohaintza AECCM (Bularreko Minbizia Metastasikoaren Espainiako Elkartea) elkarteari ematea aukeratu dute bezeroek.

SAALDA proiektua martxan jarri genuenetik egiten dugun hirugarren dohaintza da:

Urtarrileko eta otsaileko irabaziak Aspanogi eta Aita Mari – Salvamento Maritimo Humanitario elkarteei eman genion.
Martxoko eta apirileko irabaziak Zaporeak elkarteari.
Maiatzeko eta ekainekoak AECCM elkarteari.

Gure txikian bada zerbait. Mundua toki pixka bat hobea egiteko harri koxkorra