SAALDAren lehen sei hilabeteak

Sei hilabete bete dira SAALDA saltzen hasi ginenetik. Enpresa hilabete pare bat lehenago eratu bagenuen ere, 2024ko urtarrilaren 15ean ekin genion saltzeari.

Salmenta gabe jai dauka edozein enpresak, eta lehen salmenten data hori daukat ondo iltzatuta buruan. Bihotzez eskertzen dizuet alboan izan eta babesa eskaini diguzuen bezeroei.

Hutsetik hasi eta ekitea ikaragarri zaila izan daiteke, baina baita erronka ere. Koadro zuri bat neukan nire aurrean. Enpresa bat, marka bat, kontakizun bat, egokien ikusten nuen moduan sortu eta moldatzen joateko aukera.

Horretan dihardut azken sei hilabeteetan.

Abenduan lehen behi-hezur salda ekoizpena egin genuenean (eta faktura ordaintzean, bereziki) beldur puntu bat sartu zitzaidan. “Uf, ea ez dudan hanka barruraino sartzen eta ekoizpen hau ez den saltzen”. Beldur eszenikoa. Ideiak izatea gauza bat da, ideiak ondo gauzatzea bestea.

Baina, hara, saltzen hasi eta sei hilabetera ia amaituta dago lehen ekoizpenean egin genuen poto-sorta hura eta bigarren ekoizpen bat egin genuen.

Gehiago esango dut, bigarren ekoizpena… eta produktu gehiago!

Super SAALDA

Super SAALDA izan zen aurrena. Etxean 400 ml-ko potoa erdibana egiten genuen Mariak eta biok, baina alabetako bat hasi zen esanaz berak ere nahi zuela. Matematikak pikutara. Horrela hasi ginen 870 ml dituen Super SAALDA egiten.

HOONDOA

Gero etorri zen HOONDOa. Delikatetxeko lagunei esan nien bestelako produktu bat nahi nuela saldu, zerbait desberdina, merkatuan gutxi ikusten dena. Haiek landu dute produktua eta bezeroek jarri diote izena.

Dohaintzak

Eta, dohaintzak? SAALDA enpresa berezi bezala sortu nuen. Bere helburua mundua toki pixka bat hobea egitea delako, horretarako lortzen ditugun irabaziak dohaintzan ematen ditugu bezeroek aukeratzen dituzten Gobernuz Kanpoko Erakundeei.

Sei hilabete hauetan 3.095 euro eman ditugu dohaintzan, bezeroek proposatu eta aukeratutako lau elkarte eredugarriri, bi hilabetero egin dugun prozesu ederretan (bat, bi eta hiru).

Lehen pausuak

2024 proba bat bezala ikusten nuen. Ea SAALDA bezalako ekimen batek zentzua izan ote zezakeen.

Zentzurik ote duen ez dakit baina oso ederra izaten ari da.

Hiru mila euro pasatxo dohaintzan emanda. Lehen ekoizpena ia amaituta. Bigarren ekoizpen bat egin dugu. Behi-hezur salda poto handiagoan ere jarri dugu eskuragarri. Eta produktu berri bat saltzen hasi.

Ño. Zerotik hasi izateko bada zerbait.

Gure txikian, nago mundua toki pixka bat hobea egiten ari garela. Eta horrek zentzua ematen dio ahalegin ero honi.

Mikel Lizarralde
2024-07-23

Blogeko beste artikulu batzuk:

Laugarren dohaintza

2024-11-13

Dohaintza bat eginez ekitea asteari gauza ederra da. Horrela hasi zen nire astea.

Aurrena ikusi nuen ea nor bozkatu duten bezeroek dohaintza egiteko, buletinaren eman nien bozketaren berri bezeroei eta aukeratutako elkartearekin kontaktuan jarri ostean transferentzia egina zegoen. Di-da.

Uztailetik urrira artean 590 euroko irabazia izan dugu SAALDAn. Hori da bezeroek aukeratu duten elkarteari eman dioguna.

Normalean bi hilean behin egiten dugu irabazien dohaintza baina uda-partean gutxi saldu genuenez ez nuen euro gutxi batzuetako dohaintza egin nahi. Fundamentu pixkat izan zezala.

Tira, 590 eurorekin ez dugu elkarte baten urtea konponduko, baina hori zen irabazi duguna eta borondate onenarekin eman dugu. Bezeroek proposatu eta aukeratutako elkartea Izan Iñurri da. Bularreko minbizia daukaten emakumeekin jarduten duen elkartea. Ahalduntzean eta akonpainamenduan lan handia egiten dute. Bota begiratu bat haien webgune eta online dendari, produktu solidario ederrak saltzen dituzte eta.

SAALDA proiektua martxan jarri genuenetik egiten dugun laugarren dohaintza da:

Urtarrileko eta otsaileko irabaziak Aspanogi eta Aita Mari – Salvamento Maritimo Humanitario elkarteei eman genion.
Martxoko eta apirileko irabaziak Zaporeak elkarteari.
Maiatzeko eta ekainekoak AECMM elkarteari.
Uztailetik urrira artekoa Izan Iñurriri.

Aurrekoetan nioena errepikatuz, gure txikian bada zerbait. Mundua toki pixka bat hobea egiteko harri koxkorra

Argazki lehiaketaren emaitza

2024-09-19

Uztailaren amaieran iragarri genuen SAALDAren argazki lehiaketaren emaitzak hemen dauzkazu.

Orduan genioen moduan, zein GKE edo proiektu lagundu bezeroek aukeratzen dute. Zerbait erabakitzen utziko diguzue geuri, ezta? Argazki lehiaketa besterik ez bada ere 😉