Sei hilabete bete dira SAALDA saltzen hasi ginenetik. Enpresa hilabete pare bat lehenago eratu bagenuen ere, 2024ko urtarrilaren 15ean ekin genion saltzeari.
Salmenta gabe jai dauka edozein enpresak, eta lehen salmenten data hori daukat ondo iltzatuta buruan. Bihotzez eskertzen dizuet alboan izan eta babesa eskaini diguzuen bezeroei.
Hutsetik hasi eta ekitea ikaragarri zaila izan daiteke, baina baita erronka ere. Koadro zuri bat neukan nire aurrean. Enpresa bat, marka bat, kontakizun bat, egokien ikusten nuen moduan sortu eta moldatzen joateko aukera.
Horretan dihardut azken sei hilabeteetan.
Abenduan lehen behi-hezur salda ekoizpena egin genuenean (eta faktura ordaintzean, bereziki) beldur puntu bat sartu zitzaidan. “Uf, ea ez dudan hanka barruraino sartzen eta ekoizpen hau ez den saltzen”. Beldur eszenikoa. Ideiak izatea gauza bat da, ideiak ondo gauzatzea bestea.
Baina, hara, saltzen hasi eta sei hilabetera ia amaituta dago lehen ekoizpenean egin genuen poto-sorta hura eta bigarren ekoizpen bat egin genuen.
Gehiago esango dut, bigarren ekoizpena… eta produktu gehiago!
Super SAALDA izan zen aurrena. Etxean 400 ml-ko potoa erdibana egiten genuen Mariak eta biok, baina alabetako bat hasi zen esanaz berak ere nahi zuela. Matematikak pikutara. Horrela hasi ginen 870 ml dituen Super SAALDA egiten.
Gero etorri zen HOONDOa. Delikatetxeko lagunei esan nien bestelako produktu bat nahi nuela saldu, zerbait desberdina, merkatuan gutxi ikusten dena. Haiek landu dute produktua eta bezeroek jarri diote izena.
Eta, dohaintzak? SAALDA enpresa berezi bezala sortu nuen. Bere helburua mundua toki pixka bat hobea egitea delako, horretarako lortzen ditugun irabaziak dohaintzan ematen ditugu bezeroek aukeratzen dituzten Gobernuz Kanpoko Erakundeei.
Sei hilabete hauetan 3.095 euro eman ditugu dohaintzan, bezeroek proposatu eta aukeratutako lau elkarte eredugarriri, bi hilabetero egin dugun prozesu ederretan (bat, bi eta hiru).
2024 proba bat bezala ikusten nuen. Ea SAALDA bezalako ekimen batek zentzua izan ote zezakeen.
Zentzurik ote duen ez dakit baina oso ederra izaten ari da.
Hiru mila euro pasatxo dohaintzan emanda. Lehen ekoizpena ia amaituta. Bigarren ekoizpen bat egin dugu. Behi-hezur salda poto handiagoan ere jarri dugu eskuragarri. Eta produktu berri bat saltzen hasi.
Ño. Zerotik hasi izateko bada zerbait.
Gure txikian, nago mundua toki pixka bat hobea egiten ari garela. Eta horrek zentzua ematen dio ahalegin ero honi.
Bezero batek galdetu zidan ea zergatik gure hezur-salda zen horren likidoa. Bere ahizpak etxean prestatzen zuela eta askoz likatsuagoa (gelatinosoagoa) geratzen zitzaiola.
Ez naiz kimikaria, beraz, zer egin nuen? Delikatetxeko Edurneri galdetu, haiekin egiten dugulako gure hezur-salda, eta hona hemen bere erantzuna:
Bezero askok galdetzen didate ea kristalezko potoak berrerabili nahi ote ditugun SAALDAn.
Nahi… nahi…
Gauza bat da etxean kristalezko potoak berrerabiltzea. Oso ondo garbitu eta kitto. Berriz erabiltzeko moduan daude.
Baina elikagaien industrian ez da horren erraza: kristalezko potoa esterilizatu egin behar da elikagaiak berriz bertan sartu aurretik. Eta esterilizatzea ez da horren erraza, ezta merkea ere.