Mugarri txiki bat gehiago

“Erakutsi egin behar duzu nola prestatzen den SAALDA”. Nire emazteak esan zidan hau. Delikatetxera eraman nuen ikusi zezan nola egiten duten SAALDA eta konbentzitu ninduen prozesua dokumentatu nezan (bisita gidatuak antolatzea baino errazagoa da).

Berez, hezur-salda eta sukaldean egiteko hondoa prestatzeko jarraitu beharreko prozesua oso erraza da. 

Beheko bideo laburrean ikusi dezakezu Delikatetxeko lagunek jarraitu zuten prozesua SAALDA eta HOONDOa prestatzeko gure azken ekoizpena egin genuenean.

Azken ekoizpen hau dokumentatu nahi izan nuen jendeak ikusi dezan nolakoa den prozesua. Berez, ez dago misteriorik. Lana txukun eta zorrotz egitea da sekretu bakarra, bertako ekoizleei erositako osagaiak erabiltzeaz gain.

SAALDA egiteko behi-hezurrak, tipulak, porruak, azenarioak, apioa, gatza eta sagar-ozpina nahasten ditugu marmitan, bero-beroa dagoen urarekin batera. Hogei orduz egosten da, horrela lortzen dugulako kolagenoa askatzea hezurrek.

HOONDOaren errezetan hainbat haragi mota erabiltzen ditugu (landako oiloarena eta behi-hegal eta hezurrak), tipula, porrua, azenarioa, apioa, gatza eta shiitake perretxikoak.

Bata zein bestea egosi ostean ontziratu egiten dugu eta azken pausua autoklabean sartzea da. Maria bainu moduko bat ematen diogu bertan. Honi esker iraungipen-data luzea lortzen dugu, inolako kontserbanterik bota gabe.

Sei hilabete bete dira SAALDA saltzen hasi ginenetik. Enpresa hilabete pare bat lehenago eratu bagenuen ere, 2024ko urtarrilaren 15ean ekin genion saltzeari.

Salmenta gabe jai dauka edozein enpresak, eta lehen salmenten data hori daukat ondo iltzatuta buruan. Bihotzez eskertzen dizuet alboan izan eta babesa eskaini diguzuen bezeroei.

Hutsetik hasi eta ekitea ikaragarri zaila izan daiteke, baina baita erronka ere. Koadro zuri bat neukan nire aurrean. Enpresa bat, marka bat, kontakizun bat, egokien ikusten nuen moduan sortu eta moldatzen joateko aukera.

Horretan dihardut azken sei hilabeteetan.

Abenduan lehen behi-hezur salda ekoizpena egin genuenean (eta faktura ordaintzean, bereziki) beldur puntu bat sartu zitzaidan. “Uf, ea ez dudan hanka barruraino sartzen eta ekoizpen hau ez den saltzen”. Beldur eszenikoa. Ideiak izatea gauza bat da, ideiak ondo gauzatzea bestea.

Baina, hara, saltzen hasi eta sei hilabetera ia amaituta dago lehen ekoizpenean egin genuen poto-sorta hura eta bigarren ekoizpen bat egin genuen.

Gehiago esango dut, bigarren ekoizpena… eta produktu gehiago!